تامر حسني يقدم هدية ورسالة لـ بسمة بوسيل
وجه الفنان تامر حسني، رسالة إلى زوجته السابقة بسمة بوسيل، مشيداً بكل خطواتها وما فعلته تجاه أولادهما، وتحدث عن هدية قدمها لأم أولاده الفنانة المغربية بسمة بوسيل بمناسبة يوم الأم، مؤكدا أنه يملك توثيقا مصورا لمعاناتها كأم منذ الحمل وحتى اللحظة، في رعاية أولادها، وقال إنه أصر على مشاركة أولاده الثلاثة مشاهدة هذه المقاطع ليعلموا حجم ما تحملته بسمة من مشقة.
وقال تامر حسني في رسالة لزوجته السابقة قائلا: “لما يكبروا ان شاء الله هما يعملوا كدة مع ولادهم وكمان يراعوا ربنا فينا لما احنا نكبر أوي”.
وتابع: “يا أغلى الناس، النهارده بكتب لكم بوست عن الأم ونفسي من جوه قلبي تقروه من اخ لأخواته وناتج من تجربه حقيقية بيني وبين أمي هحاول اختصره لأن الكلام عن الأم يحتاج كُتب كتير”.
وأكمل: “هبدأ كلامي بإن اكتر موقفين في عمري زعلت فيهم هما اللي كنت معاندها في الرأي و كل الناس كانت في كفه و هي لوحدها في كفه، اقسم بالله الأم بتشوف و بتحس اللي انت متعرفش تحسه، اوعى تقول انا خلاص كبرت و مش هاخد رأيها والله والله بيبقى عندك دليل وحد بيطمنك او بينبهك من مستقبل الموقف و انت مش عايز تسمع و فاكر ان هي مش مواكبه الدنيا فهيكون رأيها رجعي تفتكر ربنا هيخلق قلب ام له فترة صلاحيه يعني بيحس لفتره محدوده !!!؟ اكيد لا مركز احساسها ممدود لآخر العمر في حاجه جواها بتقولها يا اه يا لأ صدقوها.
وأضاف: “أفتكر مرة زمان أمى فضلت تقولي على واحد صاحبي انه مش كويس وغدار وحقود انا فضلت اقولها حرام عليكي دا احسن واحد في صحابي و ادافع عنه باستماته لحد ما الايام دارت و فعلاً خرج منه الجرح الكبير و الحقد الكبير اللي ميطلعش من انسان بيكرهني اصلاً و عرفت ساعتها ان في ناس حوالينا لابسين قناع الحب لحد ما المصلحه هتروح و بعدين يبان وشهم الحقيقي فعلمت نفسي متعشمش أوي في الناس عشان لما يغدروا متعبش اوي و الناس الطيبين بجد اكيد هيبانوا و يبهرونا بحبهم و ثباتهم الطويل اللي مش مشروط ولا قائم على مصلحه يعني برضو مش هنظلم حد كويس بس هنلغي فكرة التسرع في العشم الزائد”.
وتابع تامر حسني: “هاجي بقى لنقطه نفسية غريبة أنا كل ما تكون ايد امي على راسي والله والله والله بحس لو تعبان اني مرتاح لو مهموم اني مبسوط وكأنها بتشفط و بتسحب اي طاقه سلبية مش كويسة و تحط لي طاقه جميله كلها خير و راحه، الايام اللي غصب عني مش بعرف اشوفها فيها بكون متوتر قلقان ولما بشوفها بقول في سري انا بحمد ربنا عشان اتولدت لقيت الست دي أمي”.
وأضاف تامر حسني: “يلا نوريهم قد ايه بنحبهم و اللي مزعل اهله يروح فوراً يصالحهم يلا عندك سبب جميل اهوه جه من عند ربنا متخافش روح صالح ربنا هيكون معاك و هيخليك مجبور الخاطر صدقني… وأكيد اتمنى لو يفضل ده شكل علاقتنا بيهم طول الحياه مش بس في عيد الأم، كل سنة وانتي طيبة يا أمي”.
ووجه تامر حسني رسالة خاصة إلى بسمة بوسيل قال فيها: كل سنه وانتي طيبه يا بسمه وكل سنه ووالدتك الجميله طيبه … انا كل يوم يا بسمه بحكي لولادنا عن الاصول دي ومصورلهم كل تعبك معاهم من وانتي لسه حامل.
وتابع تامر حسني: هعدي عصبيتك عليا في الوقت ده مش مشكلة حقك، المهم مصورلهم مجهودك لحظة بلحظة عشان يعرفوا أنتي وأنا تعبنا عشانهم إزاي، ولما يكبروا إن شاء الله هما يعملوا كده مع ولادهم وكمان يراعوا ربنا فينا لما إحنا نكبر.
واختتم حديثه: إن شاء الله هتشوفي فيهم كل الخير عشان أنتي أم جميلة ومخلصة ليهم قدام ربنا.. كل سنة وكل أم في الدنيا طيبة، ويلا ندعي لكل أم مش معانا ربنا يرحمها ويرفع من قدرها في الجنة.
من جانبها، وجهت بسمة بوسيل الشكر لتامر حسني، ودعت الله أن يحفظ أولادهم وتوقعت أن تكون ابنتيها أمايا وتاليا من أفضل الأمهات.